फाल्गुनन्द गाउँपालिकाले ४२ जना उत्कृष्ट धान उत्पादक कृषकलाई सम्मान

फाल्गुनन्द, पाँचथर।

पाँचथरको फाल्गुनन्द गाउँपालिकाले उत्कृष्ट धान उत्पादन गर्ने कृषकलाई सम्मान गर्दै पुरस्कार वितरण गरेको छ। गत वर्षदेखि पालिकाले वार्षिक बजेट विनियोजन गर्दै किसानलाई प्रोत्साहनस्वरूप नगदसहित सम्मान गर्दै आएको छ।

यस वर्ष पालिकाले ४२ जना कृषकलाई नगद पुरस्कारसहित सम्मान गरेको छ। २०७९/८० को नीति तथा कार्यक्रममा समेटिएको यो कार्यक्रमअन्तर्गत गत वर्ष २९ जना कृषक पुरस्कृत भएका थिए। सो अवसरमा १७६ मुरी धान उत्पादन गरेका मक्कर बहादुर तामाङ प्रमुख सम्मानित भएका थिए। यस वर्ष पनि तामाङले १७४ मुरी धान उत्पादन गरी ५० हजार नगद पुरस्कार प्राप्त गरेका छन्।

यसपटक ५० हजार नगद पुरस्कार पाउने तीन जना रहेका छन्। तामाङसँगै ५४ मुरी धान उत्पादन गर्ने सुकरानी नेम्वाङ र ५२ मुरी उत्पादन गर्ने टेकबहादुर चौहानले पनि ५० हजार रुपैयाँ प्राप्त गरेका छन्। त्यस्तै, ५० मुरीभन्दा कम उत्पादन गर्ने ३९ जना कृषकलाई प्रतिव्यक्ति ३० हजार नगदसहित सम्मान गरिएको पालिका प्रमुख प्रशासकीय अधिकृत देवी तुम्बापोले जानकारी दिए।

गाउँपालिकाको घुर्बिसे पञ्चमी बजारमा आयोजित सम्मान कार्यक्रममा १ नम्बर प्रदेशका उद्योग, कृषि तथा सहकारी मन्त्री खगेनसिंह हाङ्गाम प्रमुख अतिथि रहेका थिए। सो अवसरमा स्थानीय कृषकको सहभागितामा खुसी जुलुससमेत निकालिएको थियो।

युवाहरूको आकर्षण कृषि क्षेत्रमा

२२ वर्षीय सन्देश नेम्वाङले पालिकाले किसानलाई पुरस्कृत गरेकामा खुशी व्यक्त गर्दै यसले युवालाई कृषिमा लाग्न प्रेरणा दिने बताए। “हामीजस्ता युवाले कृषिमा लगानी र परिश्रम गरेमा मासिक लाखौं आम्दानी सम्भव छ। राज्यले सहजीकरण गरिदिए विदेशिनु नपर्ने थियो,” उनले भने।

यस्तै, कृषक कल्पना केरुङले धान उत्पादक मात्र नभई अन्य कृषि उपज उत्पादन गर्ने किसानलाई पनि प्रोत्साहन गर्नुपर्ने बताइन्। “कृषिमा लाग्दा बाली नष्ट गर्ने कीराहरूको समस्या आउँछ, पालिकाले यसलाई नियन्त्रण गर्न औषधि उपलब्ध गराए झन् राम्रो हुने थियो,” उनले सुझाव दिइन्।

प्रदेश सरकारको समर्थन

कार्यक्रमका प्रमुख अतिथि मन्त्री हाङ्गामले फाल्गुनन्द गाउँपालिका कृषि उत्पादनका लागि उर्वर भूमि भएको उल्लेख गर्दै प्रदेश सरकारले पनि किसानका लागि मल सहुलियत दरमा उपलब्ध गराउने तयारी गरिरहेको जानकारी दिए।

गाउँपालिका अध्यक्ष बिर्जहाङ आङ्देम्बेले पालिकाले कृषकलाई निरन्तर प्रोत्साहन गर्दै आएको बताउँदै आगामी वर्ष यो कार्यक्रम अझ व्यवस्थित रूपमा सञ्चालन गरिने बताए। “गाउँपालिकाले आत्मनिर्भर कृषितर्फ ध्यान दिएको छ। गत वर्षभन्दा यस वर्ष उत्कृष्ट कृषकको संख्या बढ्नु सुखद पक्ष हो,” उनले भने।

अध्यक्ष आङ्देम्बेले पालिकाले ‘एक वडा, एक उत्पादन’ नीति ल्याएको जानकारी दिँदै १ नम्बर वडामा मकै, २ नम्बरमा किवी, ३ नम्बरमा आलु, ४ नम्बरमा अकबरे खुर्सानी, ५ नम्बरमा कोदो, ६ नम्बरमा कफी र ७ नम्बरमा सुन्तला क्षेत्र निर्धारण गरिएको बताए। साथै, सबै कृषकलाई अनुदान उपलब्ध गराउने योजना रहेको उल्लेख गरे।

पालिकाले खाद्यान्नमा आत्मनिर्भर बन्ने लक्ष्यका साथ २०७९/८० को नीति तथा कार्यक्रममा यो कार्यक्रम समेटिएको पालिका उपाध्यक्ष ठाकुरसिंह नेम्वाङले जानकारी दिए। “कृषकहरूको संख्यामा वृद्धि हुँदै गएको छ। आगामी वर्ष अझ बढी किसानलाई सम्मान गरिनेछ,” उनले भने।

पालिका उपाध्यक्ष नेम्वाङका अनुसार ५० मुरीभन्दा माथि धान उत्पादन गर्ने कृषकलाई ५० हजार तथा त्यसभन्दा कम उत्पादन गर्ने कृषकलाई ३० हजार नगद सहयोग प्रदान गरिएको छ।